Waitress ha Northern Samar, guin hostage han lalaki nga nabayaan han guinsakyan nga bus tikang ha Manila
TACLOBAN CITY– Arestado han mga otoridad an usa nga lalaki mahuman nga guinhostage hini an usa nga waitress ha Northern Samar.
Guinkilala an biktima nga hi Maricel Ignacio, 36 anyos an pangidaron, may asawa ngan residente han Barangay Jubasan, Allen, Northern Samar.
Samtang, guinkilala naman an suspek nga hi Jonie Topacion, 27 anyos an pangidaron, may asawa ngan residente han Barangay Dolongan, Basey, Samar.
Sumala kan PSI Rommel Quiño, hepe han Allen PNP nga biyahe tikang ha Manila an suspek kun diin nabayaan ini han guinsakyan nga bus pag-abot ha pier han Allen.
Dugang pa ni Quiño, nga guin angkon han suspek nga gumamit ini hin illegal nga droga ha nakalabay nga mga adlaw kun diin waray ini makakaon hin maupay.
Ha pagkayana, nagpapabilin pa an suspek ha Allen PNP.
Samtang, guindara naman ha hospital an biktima mahuman ini nga nakaangkon hin samad ha tuo nga kamot ngan na trauma.
