PALOMPON, LEYTE – Patay an usa nga misis mahuman nga bun-on han iya kalugaringon nga mister ha Brgy. Parilla, Palompon, Leyte dida han nakalabay nga adlaw.
Ginkilala an biktima kan alyas Pecher, 36-anyos an pangidaron, samtang an suspek naman in ginkilala kan alyas Moy, 45-anyos, parehas residente han Palompon, Leyte.
Sumala kan Palompon Municipal Police Satation Officer-in-Charge, PCapt. Rushty Alvarado, love triangle an rason han panmuno han suspek han biktima.
Basar han imbestigasyon, sakay han motorsiklo an biktima kun diin an drayber hini in an iya anak nga tipakadto an duha ha balay han gintotoohan ‘uyab’ han biktima, kun diin pag-abot han mga ini ha nasabi nga balay in waray hira sumabot nga sumunod ngay-an an suspek.
Gin aaro naman han suspek an susi han nasabi nga motor kun diin didto na nagkamay-ada hin mapaso nga debate an duha hasta nga kumuha hin pisaw an suspek ngan ginpanmuno an biktima.
Nag-angkon naman hin binun-an ha magkadiru-dilain nga parte han iya lawas an biktima.
Dayun naman nga gindara ha hospital an biktima pero gin deklara na ini nga dead-on-arrival.
Ha lain nga bahin, durante han panhitabo han insidente in nakadto ha sulod an gin aalegar nga ‘uyab’ han biktima.
Samtang, ha kaparehas nga adlaw han insidente, boluntaryo nga nagsurender an suspek ha Kapitan han Brgy. Cruz Palompon, Leyte kun diin ini residente, kaupod ha iginsurender han suspek an pisaw nga iya ginamit ha panmuno.
