CALBAYOG CITY — Humitaas hin P1.40 kada kilowatt-hour an kabug-osan nga power rate han Samar I Electric Cooperative, Inc. (SAMELCO I) yana nga Nobyembre 2026, kumpara dida han naglabay nga bulan.
Sumala kan Atty. Edson Piczon, General Manager, han Samar I Electric Cooperative, Inc. (SAMELCO I) hinungdan hini an pagsaka han tulo nga components han power bill, kun diin amo ini an generation charge, transmission charge ngan value-added tax (VAT) para ha residential consumers. Ini nga adjustment in magigin dugang nga kabaraydan han mga konsumidor nga sakop han kooperatiba yana nga bulan.
Dugang pa niya, usa ha mga hinungdan han sunod-sunod nga pagsaka han power rate amo an hitaas nga billing tikang ha Independent Electricity Market Operator of the Philippines (IEMOP), nga nagdudumara han wholesale electricity spot market (WESM). Samtang an kuryente nga napapalit han SAMELCO I tikang ha ira mga power plant ha ilarom han mga kontrata in aada la ha P5 tubtob P6 kada kilowatt-hour, mas hitaas an presyo han kuryente nga napapalit tikang ha WESM.
Pananglitan, para ha transaksyon han Oktubre nga magigin baraydan yana nga Nobyembre, maabot ha P30 milyon an kabug-osan nga kabaraydan han SAMELCO I ha IEMOP. Lakip hini an mga balanse tikang ha naglabay nga mga bulan nga waray pa mabayaran tungod han ira pagreklamo mahitungod han line rental.
Ginpaangbit ni Piczon nga dida han Agosto, waray hira magkolekta han line rental kasunod han mando han Energy Regulatory Commission (ERC). Pero, ginklaro han ERC nga diri kinahanglan suspindihon an pagkolekta hini. Tungod hini, padayon nga ginkokolekta yana han SAMELCO I an mga nahibilin nga balanse dida han Hunyo ngan Hulyo, nga nakakadugang han ira kabug-osan nga obligasyon ha pagpalit hitun kuryente.











