-- Advertisements --

TACLOBAN CITY — Gin-iimbestigaran han Tacloban City Fishery Law Enforcement Team an hinungdan han pagkamatay han mga isda nga nakit-an ha may palibot han Tacloban City Astrodome, kun diin ikaduha na ini nga higayon nga nagkamay-ada hin fish kill ha nasabi nga lugar.

Sumala kan Felix Dumlao, Coordinator han Fishery Law Enforcement Team han Tacloban City, posible nga konektado an insidente ha paghitaas hin tubig kada gab-i, nga nagigin hinungdan nga nakakasulod an mga isda ha lugar nga nakapalibot han tide embankment tikang ha may Cafe Lucia tubtob ha Astrodome.

Ginkilala niya nga lakip ha mga nakit-an nga patay nga isda an balanak, danggit ngan kikiro, nga mga lokal nga klase hin isda nga kasagaran makikit-an ha Concobato. Posible nga waray na hira makagawas han paghubas han tubig, pati na gihapon han duro nga kapaso han panahon.

Ha pagkayana, nag-organisa na an ira grupo hin operasyon agud limpyuhan an lugar ngan makuha an mga patay nga isda agud malikyan an dugang nga problema ha palibot.

Dugang pa ni Dumlao, diri liwat nira ginbabaliwaray an posibilidad nga may kalabotan an mga kemikal nga posible nga nahahalo ha tubig tikang ha mga hugaw han mga establisimyento nga hirani ha lugar. Samtang, ginpahayag ni Dumalo nga an Bureau of Fisheries and Aquatic Resources (BFAR), an makakaghatag hin eksakto nga konklusyon mahitungod han hinungdan han panhitabo.