-- Advertisements --

ORMOC CITY — Duha nga tiil han tawo an nakit-an ha usa nga sugarcane plantation ha Sitio Crossing, Barangay Domonar, Ormoc City dida han Nobyembre 17, 2026.

Sumala kan PLtCol. Rey Cabelin, Information Officer han Ormoc City Police, nakakarawat hira hin tawag pinaagi han ira hotline alas-4 han kulop mahitungod han gin-aalegar nga mga parte han lawas han tawo nga nakit-an ha nasabi nga lugar. Dayon nira ginpahibaro an Police Station 3 ngan dayon ngan nagrespode an kapulisan agud beripikaron an impormasyon.

Pag-abot han mga rumesponde nga kapulisan, nakumpirma nga an nakaputos ha usa nga plastic garbage bag in usa tuo nga tiil hin tawo. Ha ira pagdumara hin kadugangan nga inspeksyon ha palibot, nakit-an han mga awtoridad an usa pa nga tiil, nga 10 metros an kahirayo tikang ha siyahan nga nakit-an nga tiil.

Ha resulta han eksaminasyon han Scene of the Crime Operatives o SOCO, nahibaruan nga an usa han mga tiil in may tahi.

Samtang, nagpapadayon an imbestigasyon han Ormoc City Police agud mahibaroan kun hin-o an responsable ha paglabog han mga parte han lawas. Ginpatapod ni Cabelin nga magpapagawas hira hin kadugangan nga impormasyon ha oras nga makakakuha na hira hin mga testigo ngan ebidensya nga makakabulig ha pag-uswag han imbestigasyon.