TACLOBAN CITY — Upat nga insidente han sunog an nairekord han Bureau of Fire Protection (BFP-8) ha Eastern Visayas durante han pagsaurog han Undas 2026, kun diin waray naman casualty ha mga nasabi nga insidente.
Sumala kan FINSP. Vic Leonel L. Macasil, Acting Chief han Regional Operations Division han BFP-8, tulo nga sunog an nahitabo dida han Oktubre 31 ha Barangay 74 Lower Nulatula ha Tacloban City, Barangay Salvacion ha Biliran ngan ha Abuyog, Leyte. Samtang, usa naman an nahitabo dida han Nobyembre 1 ha Catbalogan City, Samar.
Ginpaangbit ni Macasil nga ha inisyal nga imbestigasyon han sunog ha Tacloban City, nahibaruan nga kandila nga waray kaparong an gintikangan han sunog. Nahitabo an sunog ha Tacloban City alas 3:25 han kaagahon, ha Biliran alas 9:00 han gab-i, ha Abuyog alas 7:30 han aga ngan ha Catbalogan City alas 12:35 han udto.
Ginkumpirma liwat ni Macasil nga an sunog ha Catbalogan City in nahitabo ha usa nga boarding house o residential area, kun diin 19 nga kabablayan an dabi ha sunog.
Ginpahayag ni Macasil nga tungod han mapaso nga panahon, mas madagmit nga magsarang it kalayo, labi na ha mga panimalay nga himo ha light materials.
