Ginkilala han testigo han defense team ni Vice President Sara Duterte nga hi Atty. Rainer Dela Fuente nga may mga red flag o kaduda-duda nga detalye ha mga transaksyon han Cale 88 Foods Corporation, an kumpanya nga gin-uugnay ha asawa han bise presidente nga hi Atty. Manases Carpio.
Ha pamakiana ni Senator-Judge Risa Hontiveros ha impeachment trial, ginlatag niya an datos tikang ha Anti-Money Laundering Council (AMLC) nga nagpapakita nga umabot ha sobra P700 milyon an kabug-usan nga salapi nga sumulod ha Cale88, samtang haros P200 milyon la an gindeklara hini nga income ha Bureau of Internal Revenue (BIR).
Gintudlok gihapon ni Hontiveros nga duha la an empleyado han kumpanya pero nakakuha ini hin haros P300 milyon tikang ha mga kumpanya ha China, labot la ha 757 covered transactions reports (CTRs) ngan suspicious transaction reports (STRs) nga may kabug-usan nga kantidad nga P1.2 bilyon.
Komo anay opisyal han AMLC, ginkumpirma ni Dela Fuente nga maikokonsidera ini nga red flag, pero ginklaro niya nga diri ini direkta nga nangangaruyag sidngon nga pagtalapas ha balaud ngan nanginginahanglan hin kadugangan nga imbestigasyon ngan pamatuod.








