CAPOOCAN, LEYTE – Maabot ha P75,000 an kantidad han salapi o e-money nga nakuha han suspek ha mga biktima ha Brgy. Lemon, Capoocan, Leyte.
Ginkilala an mga biktima kanda alyas Alina, 18-anyos ngan alyas Berna, 16-anyos an pangidaron, parehas residente han nasabi nga barangay, samtang an suspek naman in ginkilala kan alyas Mario, 41-anyos, usa nga security guard, ngan residente han Sition Apnitan, Brgy. Tag-abaca, Leyte, Leyte.
Sumala kan Capoocan Municipal Police Station Officer-in-Charge, PCapt. Joselito Mislos, pumakadto an suspek ha tindahan han mga biktima agud magpa-cash in.
Sumala ha asoy han suspek, gintawagan hiya ni Willie Revillame nga kinahanglan niya magpadara hin P40,000 ha iginsend nga number hin e-wallet kabalyo han P30,000 nga iginpatapod nga igbabalik ha iya.
Syahan nga nagpa-cash in an suspek ha mga biktima hin P33,000 nga iginsend ha nauna nga numero nga ginhatag ha suspek. Nagpadugang pa naman hin cash-in an suspek ha tindahan pero mahitungod nga naubos an balance ha e-wallet han mga biktima in pumakadto anay ini ha remittance center agud magpasulod hin e-money haira account. Kasudli na, utro nga nagpa-cash in an suspek hin P42,000 ha iba liwat nga number.
Plano pa utro han suspek nga magdugang pagpa-cash in hin P25,000 pero nakahalata na an mga biktima, kun diin dida han gin-aaro na han mga biktima an bayad nga salapi in waray na maghatag an suspek.
Dayun naman nga nagpaharurot han iya motorsiklo an suspek pabalik han lugar nga iya gintatrabahuan, kun diin dayun gihapon nga nakapangaro hin bulig an mga biktima ha mga naka-standby nga kapulisan, rason agud nasundan ngan naaresto an suspek.
Samtang, waray naman na kahibalik an kantidad nga nakuha ha mga biktima.
Sumala ha suspek, daw biktima gihapon hiya han panhitabo, pero ha kaluyo hini in papasakahan la gihapon an hin kaangayan nga kaso an suspek.
