TACLOBAN CITY – Arestado an 55 – anyos nga foreign national mahuman ig-upod an tulo nga menor de edad ha usa nga isla ha Higatangan Island Naval, Biliran.
Ginkilala an suspek kan alyas “Reid”, Amerikano, residente han Brgy. Libtong, Naval, ngan retirado nga miyembro han U.S. Navy.
Subay kan Biliran Police Provincial Office, Information Officer, PMAJ Ian Salvador Po, gindara han suspek an tulo nga 13-14 anyos nga kababayen-an, ha usa nga homestay, nga waray pahibaro o pagtugot tikang han ira pamilya.
Dayon naman nga umaro hin bulig an pamilya han mga biktima ha mga kapulisan han mahibaruan nga nawawara an mga ine.
Kasumpay hine, naglunsar hin operasyon an Naval Police Station, kabulig an Depatment of Social Welfare and Development (DSWD), Women and Children Protection Desk (WCPD), Municipal Social Welfare and Development Office (MSWDO), ngan mga opisyal han lokal nga panggobyernohan.
Naabtan an suspek kaupod an mga biktima ha usa nga accomodation ha nasabi nga isla, kun diin ine gindakop.
Ginpailarom na ha medical examination an tulo nga biktima, diin gumawas ha resulta nga usa ha ira in positibo nga naka-ekspersyensiya hin sexual activity, samtang an duha naman in waray indikasyon hin pang-aabuso.
Basar ha imbestigasyon, tulo na katuig nga nag-uukoy an suspek ha lugar, ngan may-ada pamilya nga Pilipino.
Gintutuohan nga nakilala hine an mga biktima mahitungod han pagiging harani han ira mga panimalay.
Nakaditeni na an suspek ha kustodiya han Naval Police, diin maatubang ine ha kaso nga pagtalapas ha Republic Act 7610 o (Child Abuse) ngan Statutory Rape.
Samtang, padayon naman an pahimatngon han mga otoridad ha publiko nga mahugot nga ginbabawal han balaod an bisan ano nga porma hin pakikipagrelasyon o pakighilawas ha menor de edad.
Nanawagan gihapon an opisyal ha mga kag-anak nga bantayan hin maupay an ira mga anak, ngan dayon ig-report an anuman nga kaduda-duda nga aktibidad.
