TANAUAN, LEYTE – Usa nga lawas hin lalaki nga waray na kinabuhi an natad-an ha usa nga kanal ha Brgy. San Isidro, Tanuan, Leyte dida han nakalabay nga adlaw.
Ginkilala an biktima kan alyas Kenneth, 50-anyos an pangidaron, usa nga construction worker, ngan residente han nasabi nga barangay.
Sumala kan Tanauan Municipal Police Station Officer in Charge, PCpt Raffy Cajefe, natad-an an patay nga lawas ha sulod mismo han kanal han irigasyon harani han barangay road han Brgy. Sta. Elena, Tanauan, Leyte.
Basar han imbestigasyon, nag-ininom hin makahurubog nga irimnon an biktima dida han Abril 30 han gab-i ha usa nga tindahan, kun diin gin aalegar nga mahitungod han duro nga kahubugan han biktima in nahulog o nabalinas ini harani ha kanal ngan nahulog ngan nawarayan hin malay rason han kalumos hini.
Ha gindumara nga post-mortem examination ha Rural Health Unit han bungto, nagawas nga waray foul play nga nahitabo ha insidente.
Samtang, waray naman na magduso an pamilya han biktima nga igpailarom pa ha mas mahugot nga eksaminasyon an lawas han biktima.
