Ma malaksi nga umursa an pagpapautang han mga bangko ha Pilipinas dida han Marso, nga amu an pinakahitaas ha nakalabay nga pito kabulan.
Iginpapakita hini nga mas damo nga negosyo ngan residente an nahuram hin salapi bisan hitaas an presyo han mga papliton ngan dire pa sigurado an sitwasyon ha global economy.
Subay ha Bangko Sentral ng Pilipinas, umabot ha 10.7% an paghitaas han kabug-usan nga paitang han mga dagko nga bangko kumpara dida han nakalabay nga tuig. Humitaas gihapon an kabug-usan nga kantidad han jmga patunag ha P14.6 trilyon, nga nagpapakita han mga aktibo nga kiwa han ekonomiya.
Kadam-an ha paghitaas han pautang in nahingadto ha mga sektor nga mayda dako nga kontribusyon ha ekonomoya sugad han kuryente, real estate, trade, transportasyon, turismo, ngan agrikultura.
Karuyag sidngon, mas damo nga negosyo an nagpapahaluag han operasyon, nag-iinvest, ngan nanginginahanglan hin puhunan. Dako gihapon an iginsaka han pautang para ha utilities ngan real estate, nga indikasyon han padayon nga pagdamo han proyekto ngan panginahanglan ha mga nasabi nga serbisyo.
