TACLOBAN CITY – Patay na han makit-an an usa nga tres anyos nga bata nga lalaki mahuman nga malumos ha dagat harani ha Sitio Mocal-bocal, Barangay Catmon, Naval, Biliran.
Sumala kan PInsp. Solomon Loyola, han Naval PNP, nga ginkilala an biktima nga hi Reynan Pantas, residente han mao nga barangay.
Una hini, iginreport han pamilya han biktima nga nawawara ini ngan dayon nga nagdumara hin search and rescue operation an mga otoridad.
Subay ha insiyal nga imbestigasyon, nakarigo ha mao nga dagat an biktima kaupod an bugto hini ngan usa nga patod han tigda ini nga makurian ha paglangoy.
Mahitungod naman han kahadlok han bugto han biktima ngan han patod hini in ginbayaan nira an biktima ngan waray nakagsumat dayon ha kag-anak hini bahin han mao nga panhitabo.
Ha pagbalik han pamilya han ginkariguan han mga kabataan in didto nga nakit-an nga naglutaw an tres anyos nga bata.
Gin-CPR pa an biktima han makit-an ini ngan gindara ha Biliran Provincial Hospital pero gindeklara ini nga dead on arrival han attending physician nga hi Dr. Nathaniel Borromeo.
Ginklaro naman ni PInsp. Loyola, nga waray foul play nga nahitabo ha mao nga insidente.
