TACLOBAN CITY – Ginmalatumat ni Tingog Party-List Rep. Jude Acidre nga mabug-at ha iya kasing-kasing an iya pagbotos pabor ha impeachment ni Vice President Sara Duterte ha gindumara nga sesyon han House of Representatives, dida han nakalabay nga adlaw.
Sumala hini nga dida han nakalabay nga 2022 national elections in usa hiya nga nagkampanya ngan sumuporta kan VP Sara. Dako an iya pagtuo nga kapas hi Duterte nga magsirbe ngan magmangulo kumo bise.
Ginamin ni Acidre nga usa nga makuri ngan dako nga desisyon an iya ginbuhat nga pagbotos.
Dida han ginpalusad an mga ebidensya kontra ha pagpapa-impeach ha bise, in waray ini tumuod dayon. Naglaum ini nga maghahatag hin baton ngan eksplinasyon hi VP Sara agud maklaro nga an mga ebidensya ngan alegasyon kontra ha iya in waray kamatuoran.
Ginmalatumat hini nga han nagkamayda na hin progreso an impeachment, ngan nagtitikadamo ngan nagin klaro an nagkakagawas nga ebidensya, upod na gihapon han dire pag-atender han ikaduha nga presidente ha mga hearing, in nagdesisyon na hiya.
Sumala kan Acidre nga nagin makusog an iya konsensiya nga kinahanglan unahon an Pilipinas ngan an pagigin tangkod ha pagserbisyo ha publiko kaysa ha pamumulitika ngan magin loyal ha usa nga politiko. Ngan kinahanglanon ipakita gihapon an transparensiya ngan pananagutan han usa nga mambabalaud.
Samtang, naglalaum la gihapon hi Acidre nga ha pagpasaka han impeachment ngadto ha Senado, in matatagan hin kabatunan ngan pagklaro han bise an mga alegasyon nga ginbatak kontra ha iya.
