METRO MANILA – Gin-kwestiyon ni Vice President Sara Duterte an pag-probar nga pag-aresto kan Senador Ronald ”Bato” dela Rosa pinaagi han warrant of arrest han International Criminal Court (ICC).
Ha usa nga interview ha The Hague, ginpahayag ni VP Sara nga kinahanglan anay ig-atubang ha korte han Pilipinas an anuman nga warrant of arrest nga tikang ha iba nga nasud antis ine igserbi.
“Mali ‘yan. Tulad ng ginawa nila kay dating pangulong Rodrigo Duterte, mali din iyon,” subay kan Duterte.
Dugang pa niya, an warrant of arrest nga waray igpagawas han Korte ha Pilipinas in kinahanglanon anay umagi ha local judicial process.
Manunumduman, nga gin-aresto han Marso 2025 hi anay Presidente Rodrigo Duterte basar ha warrant tikang ha ICC kasumpay han war on drugs campaign han iya administrasyon.
Samtang, utro naman nga nagpakita hi Dela Rosa ha Senado han Lunes mahuman an unom kabulan nga dire pag-atender ha sesyon.
Han iya pagbalik, ginprobaran han mga operatiba han National Bureau of Investigation (NBI) nga igsirbe an arrest warrant tikang ha ICC.
An warrant kontra kan Dela Rosa in siyahan nga ginpagawas kumo “secret” han Nobyembre 6, 2025.
Hi Dela Rosa an nagsirbe nga hepe han Philippine National Police, diin nagtutuo an proksekusyon nga may kalabutan hi Dela Rosa ha pagpapatuman han drug war campaign.
Subay kay Senate President Alan Peter Cayetano, dire aarestuhon han NBI hi Dela Rosa, mahuman an pakikipaghimangraw hine kan NBI Director Melvin Matibag.
Ginpahayag ni Cayetano an posisyon han Senado nga kinahanglanon anay umagi ha mga Korte ha Pilipinas an himangrawon han pag-aresto antis igpatuman an warrant.
Samtang, bumaribad naman maghatag hin komento hi Duterte kasumpay ha pagbabalyo han liderato han Senado nga nagresulta ha pagpapatalsik kan anay Senate President Vicente Sotto III.
