Gin aprubahan han Movie and Television Review and Classification Board (MTRCB) an ginpapamulat nga biopic kasumpay han ginkikilala nga King of Pop nga hi Michael Jackson.
Mabida ha pelikula an iya umangkon nga hi Jaafar Jackson, nga kapansin-pansin an pagkakahawig han tumalikod na ha kadayunan nga pop icon.
Gintagan ini hin PG rating, karuyag sidngon, pwede panooran han mas bata nga viewers basta mayda giya han kag-anak.
Ha pelikula, makikita an kaagi ni Michael tikang ha pagigin child star kaupod an The Jackson 5 kutob ha pagigin usa ha pinakamaupay nga ngaran ha entertainment industry.
Kaparte han kinabuhi han damo nga Pinoy hadto an iya albums nga Thriller, Bad, ngan Dangerous, pati na an mga hit songs nga Billie Jean ngan Beat It. Ngan dire gihapon mawawara an legendary moonwlak nga ginsubad han kadam-an.
