METRO MANILA – Gin-aprubaran han Senado an mosyon agud igpailarom ha protective custody hi Senador Ronald “Bato” dela Rosa samtang ginkakaatubang hine an kaso ha iya han International Criminal Court (ICC).
An nasabi nga mosyon in ginhaon ni Sen. Rodante Marcoleta nga panuyuan ma-proteheran hi Dela Rosa samtang ginagamit hine an ngatanan nga legal remedy kasumpay ha kaso.
Subay kan Marcoleta, kinahanglanon ma-proteheran hi Dela Rosa samtang pinaglalaban hine an iya katungod.
Ine an siyahan nga higayon nga utro umatender hi Dela Rosa ha sesyon han Senado tikang pa han Nobyembre 2025.
Manunumduman, nga waray ine umatender han nakalabay nga sesyon mahuman gumawas an mga report han warrant of arrest han ICC kontra ha iya kasumpay han kontrobersyal nga war on drugs ha administrasyon ni anay Presidente Rodrigo Duterte.
Antis an sesyon, ginpahayag ni Dela Rosa nga ginlanat hiya han pira nga mga personahe han National Bureau of Investigation (NBI) ha pagsulod ha building han Senado.
Mahitungod hine, ginmando han Senado nga ig-cite in contempt an nasabi nga mga personahe ngan ginpailarom an mga ine ha kostudiya han Kapulungan.
Samtang, temporaryo naman nga ginpailarom ha lockdown an Senado mahuman an pagprobar nga pag-aresto kan Dela Rosa samtang ginbubuhat an sesyon ha plenaryo.
PROBISYON NG SALIGANG BATAS
Basar ha 1987 Philippine Constitution Article 6 Sec. 11, dire pwede arestuhon an usa nga Senador samtang may sesyon an Hitaas nga Kapulungan han Kongreso kun an kaso nga ginkakadabihan in may sirot nga dire maabot ha 6 katuig nga pagkakapreso.
Bumaribad naman hi anay Sen. Antonio Trillanes IV, ngan ginpahayag hine nga waray pinagkaiba han iya nagin kaso an kaso yana ni Dela Rosa nga crimes against humanity, diin may-ada hine sirot nga ”life imprisonment” rason nga dire hiya pwede proteheran han sugad nga constitutional provision.
”Kasi doon po sa kaso noong ako’y inaresto sa loob ng Senado ito po ay reclusion perpetua [yung inihain sa akin] kaya hindi ako naproteksyunan noon ng probisyon na ‘yan,” an nagin pamahayag ni Trillanes.
