METRO MANILA – Ginkumpirma han International Criminal Court (ICC) nga hira an nagpagawas han warrant of arrest kontra kan Senador Ronald ”Bato” dela Rosa, kasumpay han mga pamatay ha ilarom han war on drugs campaign han administrasyon ni anay Presidente Rodrigo Duterte.
Basar ha 16-pages nga dokumento han ICC, nakabutang nga classified as secret” an arrest warrant pero pwede ine igpakita ha mga estado, international organizations, ngan iba pa nga mga awtorisado nga personalidad.
Han Lunes, Mayo 11, ginpahayag ni anay Senador Antonio Trillanes IV nga usa nga kopya han warrant an ginpadara ha Philippine Center on Transnational Crime.
Subay kan ICC spokesperson Orianne Maillet, ginkumpirma han tribunal nga lehitimo an dokumento han ICC nga nagsasarang ha social media.
“This arrest warrant against Mr. Ronald Marapon Dela Rosa was issued confidentially, under seal, by Pre-Trial Chamber I of the ICC on 6 November 2025,” subay kan Maillet.
Nakabutang pa ha warrant nga “reasonable grounds” agud mapamatud-an nga nagkasala hi Dela Rosa kumo “indirect co-perpetrator” ha kaso nga crimes against humanity of murder han Hulyo 3, 2016 kutob ha katapusan han Abril 2018.
Subay ha dokumento, dire maubos ha 32 katawo an napatay han magkadiro-dilain nga lugar ha nasud nga mga miyembro han law enforcement, lakip an pira nga mga hitmen ngan non-police assets, ha kasagsagan han kampanya kontra droga.
Hi Dela Rosa an siyahan nga Chief of Police han Philippine National Police ha ilarom han administrationg Duterte ngan usa ha mga pangunahon nga nagpatuman han War of Drugs campaign.
Ginpahayag gihapon han ICC prosecution nga kinahanglanon an agaran nga pag-aresto kan dela Rosa agud masigurado an iya pag-atubang ha Korte.
Dugang pa, may mga report gihapon nga naghulga hi Dela Rosa kontra ha usa nga ICC investigator ngan gintawag nga “traitors” an mga nakikipagbinuligay han imbestigasyon.
Samtang, ginprobaran naman han mga operatiba han National Bureau of Investigation nga ighaon an warrant of arrest kan Dela Rosa samtang nakada ha Senado, pero waray ine magmanilampuson mahitungod han ginpapatuman nga constitutional provition han Hitaas nga Kapulungan han Kongreso.
