NATIONAL – Ginsigurado han Department of Agriculture (DA) an supresyente nga agricultural inputs ngan assistance nga naka-andam para ha mga parag-uma nga apektado han bagyo ngan habagat.
Subay ha DA Disaster Risk Reduction Management Operations Office, naka-andam an mga binhi han humay, mais, ngan mga high value crops nga pwede ipanghatag ha mga parag-uma nga apektado.
Supresyente gihapon an suplay han mga livestock ngan mga hayop nga pwede ipanhatag, kaupod an mga biologics nga ada ha mga regional field offices han DA.
Para ha mga apektado nga parag-uma, pwede mag-loan an mga ine hin kutob P25,000 tikang ha Survival and Recovery (SURE) Loan Program ha ilarom han Agricultural Credit Policy Council (ACPC) nga pwede bayaran ha sulod han tulo katuig ngan waray igbubutang nga interes.
Naka-andam gihapon an Philippine Crop Insurance Corporation (PCIC) ha pag-validate ha mga umahan nga apektado han haluag nga pagbaha ngan pag-uran agud mai-andam an sakto nga kantidad para ha mga syahan na nga nakag-insure han ira mga umahan.
Nagpapabilin gihapon nga abilable an Quick Response Fund (QRF) para ha rehabilitasyon ngan recovery han mga umhanan nga apektado.
