Gin pahayag han Philippine National Police (PNP) nga andam ini arestuhon ni Senador Ronald “Bato” dela Rosa anuman nga oras kasumpay han implementasyon han arrest warrant tikang ha International Criminal Court (ICC), pero kinahanglan ini umagi ha sakto nga proseso pinaagi han Interpol ngan court order.
Sumala kan PNP spokesperson PBGen Randulf Tuaño, klaro an direktiba ni Interior Secretary Jonvic Remulla ha kapulisan nga nga igpatuman la an contingency plan kun may-ada kumpirmado nga ICC warrant.
Igin eksplikar ni Tuaño nga kinahanglan anay igpaagi an warrant ha Interpol ngan magkamay-ada hin sakto nga kamanduhan tikang ha lokal nga hukom ugsa ini igpatuman.
Mahunumduman nga ginkumpirma han ICC dida han Lunes nga nagpagawas ini hin warrant of arrest kontra kan Dela Rosa kasumpay han mga pagpatay ha ilarom han ‘war on drugs’ campaign dida han administrasyon ni anay Presidente Rodrigo Duterte.
Samtang, ginmalatumat ni anay senador Antonio Trillanes IV nga naipadra na ha Presidential Center for Transnational Crime (PCTC) an kopya han ICC arrest warrant.
Ha yana in ada ha protective custody han Senado hi Dela Rosa.
Labot pa hini nagsalawad an kampo han senador hin manifestation ha Korte Suprema agud umaro hin kadagmitan nga judicial protection kontra ha posible nga pag-aresto ngan pagbabalhin ha iya ha ICC.
