NATIONAL NEWS– Waray pirmahi ni Senate President Vicente “Tito” Sotto III an hangyo ni Senator Rodante Marcoleta, nga igbutang ha Witness Protection Program han Department of Justice (DOJ) an mag-asawa nga hira Pacifico “Curlee”Discaya II ngan Cezarah “Sarah” Discaya.
Nakasulod ha surat ni Marcoleta nga tagmangulo han Senate Blue Ribbon Committee nga nag-iimbestiga ha anomalya han flood control project in damo pa an mga impormasyon nga maibubuyagyag han mag-asawas nga Discaya.
Matungod na gihapon ine ha hulga han ira kinabuhi importante nga maibutang an mga ine ha witness protection program.
Baton naman ni Sotto “unfair” ha mga Pilipino nga magin state witness an mag-asawa matungod damo nag mga salapi an ira nakuha tikang ha flood control project.
Sugadman iba-iba an testimonya nira kada naatubang an mga ine ha Senado ngan ha House of Representatives.
Dugang pa ni Senate President, klarado nga nagbibinuwa an mag-asawa sanglit dire madali-dali nga paboran an hangyo ni Sen. Marcoleta.
