TACLOBAN CITY- Nagpagawas an Police Regional Office 8 hin P60,000 na reward money para ha makakagsumat
ha namumutangan han suspek nga namusil ha usa na Police Officer ha Brgy. Putong, San Julian, Eastern Samar dida han nakalabay na mga semana.
Manunumduman na guinkilala an biktima kan PO2 Fredirick Samantilla y Lazaro, Intel PNCO han San Julian Municipal Police Station.
Samtang, guinkilala an suspek kan FREDDIE HATULAN Y BASADA, 27 anyos an pangidaron ngan residente ha mao na lugar.
Man ngani, guinkakaatubang han suspek an kaso na frustrated homicide ha pagkayana.
Mababaruan na base ha report han mga otoridad na usa hi Samantilla ha mga rumesponde nga pulis dida ha nakakarawat hin impormasyon an ira buhatan na may nahitabo na indiscriminate firing ha mao na barangay kun diin pag abot han mga ini in tigda nala na guinpusil han suspek an biktima ha tiyan gamit an homemade gun o mas kilala ha tawag na “Pogakhang”.
Ha kaluyo hini, guinpasidunggan han Police Regional Office 8 hi PO2 Samantilla hin “Medalya ng Sugatang Magiting”mahitungod ha pagiging matinud-anon hini ha serbisyo.
Samtang, naglalaum naman an PRO 8 na pinaagi han reward money, dayon na madakpan an mao na suspek para ha kaangayan na disposition.
