TACLOBAN CITY – Ginmalatumat ni University of the Philippines Tacloban College Political Science Professor, Ladylyn Mangada nga dire ha publiko nagseserbi hi Senador Ronald “Bato” Dela Rosa, kundi ha uusa la nga pamilya—pamilya Duterte.
Dugang pa hini, an nahitatabo yana ha politika in an klasiko nga kaso han ‘intra-elite struggle’ kun diin nag-iinaway an duha nga gamhanan nga pamilya ha politika para han poder o posisyon ha tiarabot nga tuig-2028.
Kun diin ha kaso ni Dela Rosa in klaro nga nakikita han publiko kun hahain hiya nga pamilya nagta-trabaho o naugop.
Sumala pa kan Mangada, maaram gihapon an publiko nga may-ada dako nga parte hi Dela Rosa ha drug war campaign han nakalabay nga administrasyon kun diin hiya an Chief of Police han nasabi nga panahon.
Dire na daw gihapon bag-o ha hibaro han publiko nga kalakip hi Dela Rosa han mga kakasuhan han International Criminal Court mahitungod nga hadto paman in ginbabati-bati na ini.
Mas nagpaduro pa han kahangit han publiko in mahitungod nga imbes nga magsurender ngan atubangon an iya kaso in nagtago lugod ini ngan nagpadayon ha pagswelduhi han gobyerno.
Dugang pa, gumawas la lugod hi Dela Rosa dida han oras na han botosay han pagbalyo han liderato han Senado agud masuportahan ngan mapabilin ha pwesto an pamilya nga iya ginsusuportahan.
