Gin anunsyo han Department of Trade and Industry (DTI) dida han nakalabay nga Sabado nga magpapabilin marig-on an presyo han mga pangunahon nga papliton ha kaluyo han paghitaas han presyo han lana durot han bilihin, krisis ha Middle East, pero ha kaluyo hini, posible nga humitaas ini ha kaburubutngaan hiton Abril, 2026.
Sumala kan Trade Secretary Cristina Roque, waray pa nahihipatik nga pag hitaas hiton presyo han mga pangunahon nga panginahanglan ug prime commodities.
Kaapi hini dinhi an subra 205 stock keeping units (SKUs) nga igbabaligya ha mga supermarket, grocery, ngan online platforms. Gin lalauman nga magpapabilin la gihapon an presyo han mga presyon kutob Abril 16, samtang an pira naman nga mga produkto posible magpabilin iton presyo katub ha katapusan hiton Abril.
Nagpulong gihapon an DTI kaupod an mga manufacturer ngan retailer, kun diin gin sigurado han ahensya nga sakto an suplay ngan imbentaryo, sugad man nakakabulig ini agud malikayan an dayon nga paghitaas han presyo. Kaupod ha mga produkto nga gin momonitor han buhata an mga de-lata nga sardinas, corned beef, cup noodles, bottled water, kape, gatas, pira nga mga dairy products, ngan kandila.
Ha kaluyo hini, gin klaro naman ni Roque nga diri tanan nga produkto in sakop han listahan, amo nga gin lalauman la gihapon an pagbabag-o han presyo han pira nga brand o variant.
Samtang, gin sagdonan pa hini an publiko nga ugsa mamalit in kitaon anay an mga nakapost nga listahan han basic necessities and prime commodities (BNPC) ha mga grocery, supermarket, pati na ha opisyal nga website ngan social media pages han DTI para magkaada hin giya pamalit.
Dugang pa han ahensya, magpapadayon an snemana nga meeting kaupod an mga manufacturer para ha padayon nga ig monitor an nasabi nga sitwasyon kahuman han Abril 16.
Gin himo han DTI an nasabi nga pamahayag mahuman an report han Philippine Amalgated Supermarkets Association Inc. nga pira na mga supermarket an nag nagpaplano mag umento hin presyo han mga papliton tikang Abril 1, kaupod na an pasta, noodles, de-lata, ngan mga dulce o kendi.
Dida han Biyernes, gin klaro han DTI nga waray kamatuoran an automatic nationwide price freeze ha mga pangunahon nga papliton kasunod han pagdeklarar ni Pangulong Ferdinand Marcos Jr. ha national energy emergency an nasud pinaagi han Executive Order 110.
Basar han Republic Act 7581 o Price Act, awtomatiko nga ginpi-freeze an mga presyo han pangunahon han pangunahon nga papliton ha usa nga lugar kun ini in igindeklara ha ilarom han state of calamity, emergency, martial law, state of war, rebellion, o suspensyon han writ of habeas corpus, labot la kun may-ada espesyal nga deklarasyon nga hihimuon an Presidente.
