TACLOBAN CITY – Malipayon an pira nga mga paragbaligya hin bukad ha syudad han Tacloban tungod nga nakabawi hira han ira puhunan kakulop nga adlaw kadungan han selebrasyon han Valentine’s Day.
Sumala kan Diana Almasco, flower vendor ha Brgy. Sto. Niño Tacloban, bisan tipaunan-o in nakabawi-bawi hira han ira income nga ha kaluyo nga hitaas an presyo han pira nga mga bukad damo la gihapon an mga mamaralit.
Nagkaada manggud hin paghitaas han presyo han mga bukad an pira nga mga vendors tungod han hitaas nga presyo han mga ini tikang ha ira mga suppliers ngan sugad man an hitaas nga sukot ha pagtransport hini.
Aminado naman ini nga dako la gihapon an inibhan han ira kita yana kumpara han naglabay nga mga tuig pero mapasinalamaton an mga ini nga naka-income hira ha kaluyo han nagpapadayon nga pandemic.
Naglalaum naman ini nga may mga mahabol pa pagpalit yana nga adlaw han ira salin nga mga bukad para han naglabay nga Valentine’s Day.
