Ginpapagbul-iw han minority bloc o Solid Bloc 11 ha posisyon hi Senate President Alan Peter Cayetano, mahuman nga ha ikaduha nga higayon in ginboycott utro han majority bloc an sesyon kakulop.
Ha ginbasa ni Sen. Erwin Tulfo nga joint statement, ginduon nira nga kinahanglan nga mag-resign kumo Senate president hi Cayetano mahitungod nga nagpakita ini hin kawaray kapas nga gumanap ha responsibilidad hini kumo lider han Senado.
Gintutudlok han minorya an klaro nga pagtalapas ni Cayetano ha ilarum han Rule 13, Section 41 han rules of the Senate kun diin nakabutang nga puydi suspendiron han Senate president an pagbuhat han sesyon mahuman hiton konsultasyon ha majority ngan minority leader.
Samtang, ginmalatumat ni Sen. Ping Lacson nga ha ilarum han rules, kun waray an Senate President, puydi mag-preside an Senate president pro-tempore, an majority leader, an duha nga deputy majority leaders ngan ginduon ni Sen. Risa Hontiveros nga puydi mag-preside an bisan hin-o ha mga majority members nga gintudlok han SP.
