Boluntaryo nga sumurender an usa nga 53-anyos nga babayi nga parag-uma ha mga otoridad mahuman ini makabuno ha Brgy. Catoogan, Santa Fe, Leyte dida han mga nakalabay nga adlaw.
Basar han inisyal nga imbestigasyon, nakakarawat an suspek hin notisya nga nagkamayda hin mapaso nga argumento an anak hini nga babayi ngan han iya umagad nga lalaki, nga nagresulta han panmisikal han biktima.
Dayon nga pumakadto an suspek ha balay han biktima kun diin nagkamayda gihapon hin alterkasyon an mag-biyenan.
Durante han argumento, gintaplong han biktima an suspek. Mahitungod han duro nga kangaralson, tigda nala ginbuno han suspek an biktima ha may dughan gamit an dara-dara hini nga improvised nga pisaw nga may kahilaba nga 7-inches.
Dayon naman nga nangaro hin bulig an mga saksi kun diin, gindara han mga rumesponde nga Barangay Rescue Team an biktima ha kahirani nga ospital agud tagan hin atensyon medikal.
Samtang, sumurender naman an suspek ha mga otoridad han Santa Fe Municipal Police Station para ha kaangayan nga imbestigasyon ngan disposisyon hini.
