METRO MANILA – Ginsigurado ni Presidente Ferdinand Marcos Jr. nga may sakto nga lana an Pilipinas nga magiiha hin 50 kutob 60 kaadlaw ha kaluyo han nagtitikagrabe nga tensyon ha Middle East nga ginbabana-bana nga magpapahitaas ha presyo han lana ha bug-os nga kalibutan.
Sumala ha Presidente, bisan man posible humitaas an presyo han lana mahitungod ha geopolitical tensions, dire angay kabarak-an ha kakulangan ha suplay mahitungod ha stockpile han gasolina, fuel oil ngan kerosene nga mayda an Pilipinas.
Dugang pa niya, an mga supplier han petroleum products in may kalugaringon nga imbentaryo nga posible pa nga igpagawas, nga maghahatag hin kadugangan nga suplay para ha nasud.
Sumala pa kan Marcos nga an kasamok ha Middle East in posible nga magdara hin dako nga epekto ha pampresyuhan han lana, sanglit ginaadman han gobyerno an mga contingency measures agud mapugngan an epekto hini ha mga mamaralit. Kaupod gihapon dinhi an mga pitad agud maibanan an pas-anon han molupyo ngan negosyo kun matuod an paghitaas han presyo han fuel.
Nagpahayag gihapon an Presidente hin pag-laum nga dire magiiha an kasamok, basar ha pahayag han Estados Unidos nga posible umabot la ini hin upat kutob lima ka-semana. An mas maiha mangud nga kasamok in posible magpahitaas han kadelekaduhan ha katalwasan han sibilyan ngan labi na nga makakaapekto ini ha world economy.
