NATIONAL – Lantaran nga ginpahayag ni Presidente Ferdinand Marcos Jr. nga nagbubuwa hi anay Presidente Rodrigo Duterte kasumpay ha alegasyon hine nga mayda gin pirmahan nga blangko ha 2025 national budget.
Ha usa nga ambush interview, ginmalatumat han Presidente nga maaram daw hi Duterte kumo anay Presidente nga dire pwede magpasa hin General Appropriations Act hin mayda mga blangko nga items.
Maaram daw gihapon hi Duterte nga dire pa nahitatabo an sugad nga insidente ha kasaysayan han Pilipinas.
Duon pa ni PBBM, klaro nga nakasurat ha GAA an kada programa ngan proyekto ngan an kantidad han alokasyon ha mga ine.
Sugad han syahan nga pahayag ni ES Lucas Bersamin, mayda naman daw kopya han GAA ha website han Department of Budget and Management ngan pwede bilngon ngan kitaon didto an ginyayakan han anay Presidente ngan mga kaalyado hine nga mala-‘black check’, agud mahibarauan nga dire ine tinuod.
