PALAPAG, NORTHERN SAMAR – Usa nga patay nga lawas hin senior citizen an nakit-an nga naglulutaw-lutaw ha kadagatan nga sakop han Palapag, Northern Samar dida han nakalabay nga adlaw.
Ginkilala an biktima kan Patricio Coprada Duazo Jr., 64-anyos an pangidaron, ngan residente han Brgy. Makiwalo, Mondragon, Northern Samar.
Sumala kan Coast Guard Nothern Samar Station Commander, Lieutenant Junior Grade Joshua Gabon, nakakarawat hira hin tawag tikang ha Kapitan han Brgy. Makiwalo, Northern Samar kasumpay han insidente hin pagkawara hin usa nga paru-pangisda nga gin report han pamilya hine mahitungod nga waray na makauli an biktima mahuman nga spearfishing dida han Hulyo 28.
Dayun naman nga rumesponde an mga personahe han nasabi nga buhatan kun diin umabot hin tulo kaadlaw an gindumara nga search and retrieval operation.
Durante han pagdumara han operasyon, nakakarawat hira hin tawag tikang ha concerned citizens han Palapag nga mayda an mga ine nakit-an nga patay nga lawas nga naglulutaw-lutaw, 21 ka-milya an kahirayo tikang ha baybayon han Palapag.
Gin kumpirma naman han pamilya mismo han biktima an pangilal-an hine.
Samtang, mahitungod han kaiha na nga nagpapalutaw-lutaw ha kadagatan an lawas han biktima in ada na ine ha state of decomposition han makit-an han mga otoridad.
Nagpahinumdom naman hi LTJG Gabon ha mga katawhan nga diri na pumalaot ha kadagatan kun malain iton panahon labi na nga pabaru-balyo iton panahon ha Sinirangan Bisayas. (via Bombo Niña Magpili)
