METRO MANILA – Ginduon han Department of Energy nga an pag-amyenda ha Oil Deregulation Law an pinaka-importante nga pitad nga kinahanglan himuon han Kongreso agud maproteheran an nasud tikang ha tigdaay nga paghitaas ha presyo han lana, labi na ha panahon ha krisis o giyera.
Ha House Committee on Ways and Means, ginpakianhan ni Rep. Alfredo Garbin Jr. hi DOE Sec. Sharon Garin kun ano nga mga emergency legislative amendments an igrerekomenda han ahensya agud masolusyonan an padayon nga paghitaas han presyo han lana.
Kaupod ha mga ginpaghisgotan in kun pabor ba an ahensya ha inventory disclosure, anti-profiteering triggers, o an temporaryo nga suspensyon han excise tax ngan VAT adjustment para ha produkto han diesel.
Ginamin naman ni Garin nga waray hira sakto nga kapas ha ilarum han presente nga balaud agud pugngan an pag-kiwa han presyo ugsa pa man ini mahitabo.
Labot la ha pag-amyenda han mao nga balaud, ginduduso gihapon han DOE an polisiya kasumpay ha unbundling ngan an pagpapahaluwag ha kapas han ahensya ha industriya.
Samtang, ginmalatumat gihapon han ahensya nga maabot ha 20 ka-porsyente ha kabug-usan nga pump price ha mga gasolinahan in nagtitikang ha excise tax.
