NATIONAL–Ginkonpirma ni National Security Adviser Eduardo Año nga an Mongolian national nga gindakop ha Zambales in umilarom ha training kumo jet fighter pilot han People’s Liberation Army han China.
Ginmalatumat pa hine nga hi Boldbaatar Bold-Erdene in mayada aktwal nga koneksyon ngan nagserbe ha Chinese military.
Gintago hine an iya military background agud nga maka-enroll kumo aviation student.
Mababaruan nga gindakop an 30-anyos han ika 12 han Pebrero ha usa nga aviation school ha Iba, Zambales.
Dugang pa ni Año nga an dire pagyayakan hin kamaturoan in usa nga seryoso nga pagtalapas ha immigration laws han nasud.
Dire gihapon tugma an mga pahayag hine kun kay ano ini ada ha military location ha Zambales ngan kun ano an obligasyon niya ha nasud.
Gindakop hiya han Bureau of Immigration mahuman nga magbuhat hin aerial photography han paluparan ha Iba, Zambales ngan an harani nga Palauig River han ine in nagbuhat hin mga flight exercises.
Ginsiguro ni Año, nga an hin-o man nga langyawanon nga sugad ha ginbuhat han Mongolian national nga gindakop in ira kikihaon hin mabugat nga sirot.
