NATIONAL – Suportado an mga senador an pagpapaimbestigar ha ginbuhat nga pag-i-invest han Government Service Insurance System o GSIS ha online gambling ngan ha mga kompanya nga dako an utang ngan dire maupay an track record.
Nagpalusad hin resolusyon dinhi Sen. Imee Marcos samtang nag-privilege speech gihapon dinhi hi Sen. Risa Hontiveros agud paimbestigaran an report han Department of Finance nga nag-invest an GSIS hin sobra P1B ha online gambling platfrom nga Digiplus kun diin nalugi pa an ahensya matungod nga lumaprak ha P13.68 an kantidad kada share samtang napalit ini ha kada share hin tag P65.30.
Sumala kan Sen. Sherwin Gatchalian, an pondo nga kapot han GSIS in ginpagkurian han mga mananarabaho ha gobyerno sugad han mga magturutdo, pulis ngan healthcare workers sanglit dapat la nga makita ini han Senado.
Ginaaghat gihapon han senador an GSIS nga makigbubligay ha pagbubuhaton nga imbestigasyon.
Samtang andam naman hi Sen. Raffy Tulfo nga pangitaon kun hin-o an mga nangomisyon ha kwestyunable nga investment na ini.
