TACLOBAN CITY – Padayon an pagpamulat han mga eskwelahan ha elementarya ngan sekondarya ha syudad han Tacloban para han mga estudyante nga waray pa makapag-enroll yana nga nakatalaan na na nga maghuman an enrollment ha Hulyo 15 o buwas nga adlaw.
Una hini, tikang han enrollment period nga June 1-30, 2020 in ginpahilawig ini han Department of Education (DEPED) tubtob yana nga Hulyo kinse para matagaan hin higayon an mga estudyante nga waray pa makapagpaenroll.
Sumala kan Erick John Estoque, School Information Officer han Cirilo Roy Montejo High School, maabot ha 1,616 an ira naging enrollees han tuig 2019 sanglit amo gihapon nga ihap an ira ginlalauman nga enrollees para yana nga school year 2020-2021 nga nakatalaan nga mag-abre yana nga Agusto 24.
Ha pagkayana in maabot na ha 1,422 an nagpaenroll ha ira eskwelahan ngan 194 nala an ira ginpapamulat.
Ginsisiguro naman nira nga makompleto tanan han ira mga enrollees tungod na gihapon han mandato han DEPED nga mapadayon la gihapon an pag-aram han mga kabataan ha kaluyo han ginkakaatubang nga pandemya.
