TACLOBAN CITY – Ginsisiguro han Commission on Elections (COMELEC) Regional Office 8 nga hapsay nga pagdudumaraon an eleksyon yana nga tuig bisan ha mga lugar nga naapektaran han bagyong Odette han naglabay nga tuig ngan han bagyong Agaton han naglabay nga mga semana.
Una hini, tungod han grabe nga distroso han bagyong Odette ha Southern Leyte, ginpahayag han Southern Leyte Electric Cooperative nga dire nira mahahabol san-o an eleksyon an pag-energize han tanan nga mga barangay labi na gud an mga tay-aw nga mga lugar ha ira probinsya.
Sumala kan Jenette Fariola Ruedas, tagapagyakan han COMELEC Regional Office 8, nakipagsumpayan na hira ha mao nga electric coop sugadman ha NGCP ngan ginpaghingdayan kun ano an pagbubuhaton nga pitad agud nga masiguro nga dayon la gihapon an piniliay ha mao nga probinsya bisan kun mayda mga barangay nga waray pa suplay hin kuryente.
Basar ha ira napagkasarabutan, magagamit hin generator sets an mga barangay nga waray kuryente sugadman an mga eskwelahan nga waray pa kaaayad tungod han bagyo in magamit la anay hin mga makeshift facilities kumo polling areas.
