TACLOBAN CITY – Nakit-an nga patay an usa nga magtala-amay haira luonan hin lubi ha Jaro Leyte.
Ginkilala an mga biktima kanda Alden Japordo, 53 anyos an pangidaron ngan hi Alwin Japordo, 27 anyos an pangidaron residente han Brgy. Canhandugan Jaro, Leyte.
Sumala han PMaj. Ronaldo Puso, Chief of Police han Jaro Municipal Police Station, lumakat daw an mga biktima haira panimalay para magluon hin lubi dida han Setyembre 4 pero waray na umuli haira sanglit gin kadto daw ine han asawa han biktima nga hi Alden Japordo, ngan didto na daw nakit-an hine nga waray na kinabuhi an iya magtala-amay.
Subay naman ha inisyal nga imbestigasyon han kapulisan, mayda daw igo hin bala hin pusil an mga biktima ngan mayda gihap nakit-an nga mga basiyo hin bala an kapulisan pero waray pa hibarue kun kanan anu ine nga klase hin pusil.
Hapagkayana, padayon pa an gindudumara nga imbestigasyon han mga otoridad kasumpay ha mao nga panhitabo.
