Maduon nga ginpanhimuwa ni Executive Secretary Ralph Recto an mga hurob-hurob ngan panruba kasumpay ha panlawas ni Presidente Ferdinand Marcos Jr., kadungan han pagpaparayaw han waray-undang nga pagta-trabaho han presidente para ha nasud.
Ha usa nga aktibidad ha probinsya han Batangas nga gin atenderan mismo han Presidente, direkta nga ginbaton ni Recto an mga isyu nga nakwestyon ha pisikal nga kapas han Punong Ehekutibo.
Sumala ha sekretarya, klaro nga nagpapakita hin makusog nga liderato hi Marcos nga harayo naman ha iginhuhulagway han mga kritiko.
Gintagan-duon hi Recto nga an Presidente in ada ha maupay nga kondisyon—dire nagamit hin wheelchair, waray sungkod, ngan dire ‘uugud-ugod,’ kabaliktaran ha mga malisyoso nga impormasyon nga iginpapasarang han pipira.
Kumo pamatuod han kakusog han Presidente, igindetalye han Executive Secretary an adlaw-adlaw nga iskedyul hini tikang aga kutob gab-i.
Sumala kan Recto, nagseserbi nga alarm clock niya an Presidente mahitungod ha timprano nga pagtawag ngan pagpapadara hin mensahe kasumpay ha trabaho, nga danay in naabot pa hin kutob ha oras han pagkaturog.
Ha sulod naman han Malakanyang, igin hulagway han sekretarya nga saka-lusad an Presidente mahitungod ha paluyu-luyo nga mga opisyal nga pagharampang, labot pa ha mga aktibidad hini ha gawas han Palasyo.
