Kompyansa hi Bicol Saro Partylist Representative Terry Ridon nga may-ada sadang ngan madig-on nga ginpapatamakan agud sumaka ha Senado an impeachment complaint kontra kan Vice President Sara Duterte, ilabi na han nadiskubrehan nga ₱6.7 bilyon bank transactions ngan pag hulga hini ha kinabuhi han presidente.
Ini in gin malatumat ni Ridon nga an mga gumawas nga impormasyon han nahinabo nga hearing han House Committee on Justice.
Subay han mambaralaod, dako nga kantidad hin salapi an sumulod ngan gumawas ha mga bank accounts nga igin susumpay ha Bise Presidente ngan asawa hini nga hi Atty. Mans Carpio ha sakob hin pira ka tuig nga nagseserbi kumo makusog nga gin papatamakan han reklamo kuntra ha bise.
Labot la han kaduda-duda nga gios han salapi, gin tagan duon han mambaralaod nga an mga nauna nga hearing kanit han isyu han confidential funds in nagpapakita nga klaro na an probable cause kontra kan Duterte.
Samtanga, gin lalauman naman nga ha masunod nga hearing in dedesisyunan han komite kun aabrehan an mga dokumento han Bureau of Internal Revenue (BIR) nga may kalabutan ha kaso.
Mahitungod hini, gin iimbitaran hi National Bureau of Investigation (NBI) Director Atty. Melvin A. Matibag agud mag hatag hin kadugangan nga impormasyon kanit ha daw assassination plot han Bise Presidente kontra kan Pangulong Ferdinand Bongbong Marcos, First Lady Liza Marcos, ngan anay House Speaker Martin Romualdez.
Para kan Ridon, bisan waray kadugangan nga ebidensya, sadang na an mismo nga mga pamahayag han Bise Presidente.
Agod pormal nga maisaka ngan magapdayon an kaso ha Senado, gin kikinahanglan nga makuha an majority vote nga 21 tikang ha 39 nga miyembro han House Committee on Justice.
