Nanawagan hi Senator Erwin Tulfo ha iya mga kaupod ha Senado nga dagmiton an pagrerepaso han Oil Deregulation Law, kasunod han padayon nga paghitaas han presyo han lana durot han padayon nga gyera ha Middle East.
Sumala kan Tulfo, dehado an mga Pilipino ha presente nga balaod mahitungod ha limitado nga kapas han gobyerno ha pagkontrol han presyo han mga produkto nga petrolyo.
Dugang pa hini, ha ilarom han presente nga sistema, puydi la umapela an an gobyerno ha mga oil companies nga diri masyado pahitas-an an presyo han lana kun an presyo hini in nahitaas han world market.
Kasumpay hini, sinuportahan ni Tulfo an igin haon han igkasi senador nga hi Senator Sherwin Gatchalian nga Senate Bill No. 641 o an institutionalizing Transparency in the Philippine Downstream Oil Industry agud repasuhon an RA 8479.
Panuyuan han mao nga balaod nga makita an “unbundled prices” o detalyado nga presyo han mga kumpanya han lana agud magin klaro ha publiko an breakdown han presyo.
Ini in mahitungod han overpricing han mga produkto nga petrolyo nga iginbabaligya han mga gasolinahan.
Sumala kan Tulfo, panahon na agud magkaada hin balaod nga magmamando ha mga kumpanya han lana nga ig pakita an tinuod nga costing han mga produkto nga lana nga igin babaligya ha publiko.
Gin tagan duon pa han senador nga maiha na nga panawagan han transport sector an pagpapawaray bisa o pagbabag-o han mao nga balaudnon.
