Nakatalaan nga balikan han Korte Suprema an sensitibo nga istoryahon kasumpay ha pagkilala han Pilipinas ha foreign divorce, pinaagi han pagpapadayon han oral arguments ha maabot nga Martes, Abril 28, banda alas-2 hiton kulop.
Nakasentro an istoryahon ha usa nga partikular nga kaso han mag-asawa nga Pilipino nga nagpakasal ha Pilipino, pero ha pag-iha in nagpailarom, ngan ginhatag an divorce ha Estados Unidos.
Ginkikita han mga mahistrado kun patiunan-o matugma an nasbai nga pitad ha ginpapatuman nga Family Code han Pilipinas.
Ginlalauman nga magigin landmark case an magigin desisyon han Korte Suprema hini.
An anuman nga magigin desisyon han mahistrado in magtutudlok han panibag-o nga standard ngan magkakamay-ada hin dako nga epekto ha panlantaw ngan pagtratar han sistema nga legal han Pilipinas ha mga foreign divorce nga nakukuha han mga Pilipino ha iba nga nasud.
Ha presente, ginkikilala la an foreign divorce ha nasud kun an usa nga Pilipino in kasal ha usa nga langyawanon nga nakakuha hin diborsyo ha iba nga nasud, nga naghahatag gihapon hin kapasidad ha Pilipino nga asawa nga utro magpakasal.
Manunumduman nga syahan nga gintudlok ngan iginsulod ha oras arguments han pinakahitaas nga hukuman an nasabi nga kaso dida han Agosto han nakalabay nga tuig.
An hearing ha Martes in ginlalauman nga magtatag-usa-usa ha mga nasasalin pa nga legal nga isyu ugsa igsalawad an kaso para ha pinal nga desisyon.
