Umabot na ha sobra 7,600 an ihap han mga Overseas Filipino Workers (OFW) ngan ira mga pamilya an talwas nga nakauli ha Pilipinas ha butnga han nagpapadayon nga tensyon ha Middle East, kasunod han pag-abot han panibag-o nga batch han mga Pilipino tikang ha Kuwait kakulop, Abril 25.
Subay ha Department of Migrant Workers (DMW), ada ha 196 nga mga OFWs tikang an Kuwait an malinangpuson nga nahiuli ha nasud sakay han usa nga commercial flight.
An nasabi nga pitad in kaparte han mas ginpahuru-hugot nga repatriation efforts han nasyunal nga gobyerno agud ighirayo ha kadelikaduhan an mga Pilipino nga apektado han kasamok ha rehiyon.
Dayun nga gintapo han mga tinaglawas han ahensya an mga umuli nga mga kababayan.
Subay ha pinakabag-o nga datos han DMW, tikang han Marso 5 kutob Abril 24 han presente nga tuig, umabot na ha eksakto nga 7,600 nga mga OFWs ngan ira mga dependents an naibakwit pabalik han Pilipinas.
Tikang ha kabug-usan nga ihap hini, haros 7,000 nga indibidwal an direkta nga nakatagamtam ha government-funded repatriation.
Ginbubug-os ini han sobra 5,600 nga mga mananarabaho ngan sobra 1,300 nga mga dependents o paryente han mga ini.
Padayon naman nakatutok an DMW ngan an Department of Foreign Affairs (DFA) ha sitwasyon ha Middle East agud mag-asister ha iba pa nga mga Pilipino nga karuyag umuli ha nasud.
