CATBALOGAN CITY – Nabalabgan han mga otoridad han Catbalogan City District Jail an ginsmu-smuggle nga sigarilyo han duha nga indibidwal nga nagdudul-ong hin pagkaon ha usa nga Person Deprived of Liberty.
Sumala kan City District Jail Warden JSUPT. Gusser Gadong, nga nakumpiskar han mga otoridad an mga sigarilyo mahuman nga mapansin han mga searcher nga madakmol an ilarum han burutngan han pagkaon.
Dida han ginabrihan han mga searchers an dara han mga indibidwal, nasabtan nga mayda sulod nga sigarilyo an ilarum han burutangan hin sura ngan ha burutangan gihapon han kan-on kun diin, maabot sobra 40 ka-piraso nga sigarilyo an nakumpiskar han mga otoridad.
Dugang naman ni Gadong, nga mahitungod nga dire mangud sugad kabug-at iton sigarilyo kumpara ha iba nga kontrabando, in waray na nira gindakop an mga suspek; mahuman na gihapon an ira ginbuhat nga pamakiana ngan imbestigasyon ha mga ini.
Sumala ha opisyal nga ginpasakahan nira hin penalidad an mga suspek basar ha ordinansa han syudad ngan multa nga P3,000 ngan sugad man community service.
Samtang, ginbutang naman nira an ngaran han usa ha mga indibidwal ha ira watch-list, mahitungod nga na-preso na ini ha Manila ha parehas nga kaso ngan ira gintutuohan nga amo an nagpapaluyo han smuggling hiton tobacco ha sakob naman han ira pasilidad.
