TACLOBAN CITY – Iginbida han mga kapulisan ha Leyte Police Provincial Office (LPPO) an ira mga naging accomplishments ha syahan nga bulan han tuig 2019 ha paglingkod ni PSsupt. Rolando Bade kumo Police Provincial Director.
Sumala kan PSI Edgar Octaviano, spokesperson han LPPO ha pagkayana maabot na 166 an ira mga naaresto ha ira police operations kun diin upat ha mga ini an naaresto nga Top 10 most wanted person ha magkadirudilain nga bungto han probinsya han Leyte.
81 naman ha mao nga ihap an nadakop nga iba pa nga wanted persons, upatan naaresto ha search warrants, 12 an naaresto ha pagtalapas han RA 9165 o Dangerous Drugs Act of 2002.
Duha nga suspek an naaersto may ha pagtalapas han PD 705 o an Forestry Reform Code of the Philippines, duha an arestado ha pagtalapas han RA 8048 Coconut Preservation Act, 38 katawo arestado ha pagtalapas han RA 8550 Philippine Fisheries Code of 1998, 12 naman ha RA 9827 may kalabutan ha illegal gambling, ngan upat ha pagtalapas han RA 10591 Comprehensive Firearms and Ammunition Regulation Act.
Maabot gihapon ha 20 nga mga motorsiklo an na-impound ha pagkayana ha nagpapadayon nga operasyon.
Ha pagkayana, in ginpatapod naman han mga kapulisan ha bug-os nga probinsya han Leyte nga mas pahuhuruhuguton pa an ira gindudumara nga operasyon agud nga mapuypoy na an mga indibidwal nga natalapas ha mga balaud nga ginpapatuman han gobyerno.
