Ginpabakwit han Russia an ngatanan han diplomat ngan iba pa nga langyawanon nga nag-uukoy ha mga embahada, konsulado, ngan mission houses ha pinakadagmit nga panahon.
Ginmalatumat ni Russia spokeswoman Maria Zakharova nga posible bombahon hin duro han Russia an Kyiv, kapital han Ukraine, kun aatakehon han Ukraine an Moscow ha adlaw han Victory Day.
Syahan hini, parehas nga nagdeklara hin temporaryo nga ceasefire an magkaluyo nga parte dida han Mayo ngan 6 pero ginbag-o han Russia an petsa ngan ginhimo nga Mayo 8-9 mahitungod ha mga pag-atake han kada usa.
Labot ha mga pasilidad han lana, barko ha Black Sea, adlaw-adlaw nga gin aatake han mga Ukrainian drone an Moscow nga pagdudumaraan han Victory Parade. Naghulga pa han Ukraine nga bobombahon hini an Moscow mismo ha mga adlaw han nasabi nga tinuig nga selebrasyon han Russia.
Mahitungod ha mga binuhatan han Ukraine, adlaw-adlaw gihapon nga ginbobomba, gindo-drone, ngan ginmi-missile han Russia an damo nga lugar han Ukraine pero talagsaon la hini atakehon an Kyiv.
Samtang, yana la nagpahimatngon hin sobra an Russia nga ngatanan han mga langyawanon nga tinaglawas han iba nga mga nasud in kinahanglan magpahirayo ha Kyiv.
Sumala kan Zakharova, kinahanglan mamati hin maupay ngan seryosohon an pahimatngon han pagbabakwit agud malikayan an dire maupay nga panhitabo.
Kaupod ha mga posible gamiton han Russia an missle nga Oreshnik nga mayda unom nga dagko nga bomba usa ka-buto ngan dire basta-basta mapapalaprak han anuman nga panalipod han Ukraine.
Naabot ha walo kakilometro palibot an kaso rubaon han Oreshnik.
