NATIONAL–Ginkalro han defense lawyer ni anay Pangulong Rodrigo Duterte nga hi Atty. Nicholas Kaufman nga dire pagpatay kundi pagdakop an karuyag-sidngon han naeutralization ha police operations ha anti-illegal drugs campaign.
Ginbuhat ni Kaufman an pagklaro kumo tugon ha ginpresenta nga ebidensya han Prosekusyon nga “PRRD list” nga gintawagan ha usa nga media report kumo “kill list” kun diin an pira nga high value targets kalakip hira anay Albuera Mayor Rolando Espinosa Sr. ngan Raul Yap in nahipatik kumo “neutralized” o napatay.
Ginkontra ni Kaufman nga gineksplikar mismo han testigo han prosekusyon nga an neutralization ha police operations in naruruyag-sidngon nga pagdakop ngan dire pagpatay.
Depensa ni Kaufman nga an neutralization in usa nga lawful restraint o legal nga pagdakop o pagpugong ha criminal ngan dire otomatiko nga pagpatay.
Ginklaro gihapon han duha nga testigo nga pwede gumamit la hin “lethal force” kun an suspek in nakigbisog nga magbubutanh ha kinabuhi han police officer ha risgo, nga salig ha ordinary nga doctrine han self-defense.
Dugang pa, ginklaro han una ha publiko ni anay Philippine National Police (PNP) Chief ngan presente nga Senador Ronald dela Rosa nga an neutralization in naruruyag-sidngon hin pagaresto o pagdakop basar ha PNP operational procedure manual.
Gintagan gihapon hin duon han depensa nga waray nagpagawas hin ruling an Korte Suprema han Pilipinas nga nagdedeklara ha drug war kumo pagtalapas ha balaud ngan waray gihapon ginpawaray hin bisa an mga circular han PNP nga laman an nasabi nga termino.
Ha kaluyo naman nga banda, ginmalatumat han mga testigo hanprosekusyon ha ICC nga ha konteksto han Oplan Tokang, an “neutralize” in naruruyag-sidngon nga mando nga magpatay.
