TACLOBAN CITY – Nanindugan an pamunan han Eastern Visayas State University EVSU Tacloban, nga dire hira makakagpugos ha mga estudyante nga mag-eenroll ha ira skwelahan nga magpabakuna kontra COVID-19 para yana nga pag-abre hiton klase.
Sumala kan Lydia Morante, Head Media Affairs, Eastern Visayas State University Tacloban, waray mangud balaod nga kinahanglan an tanan nga mga estudyante nga masulod ngan magpapa-enroll yana nga school year in dapat bakunado na, ngan waray gihapon kamanduhan nga dire nira dapat kakarawaton an mga unvaccinated nga studyante.
Dugang pa han mao nga opisyal, dire naman karuyag sidngon nga ira ginpapaboran an sugad nga sitwasyon, ine in kumo respeto ha desisyon han usa nga indibidwal ha iya panlawas.
Ginmalatumat naman han nasabi nga opisyal, nga padayon an ira pag-aghat ha mga estudyante nga dire pa vaccinated nga magpabakuna na matungod nga ine in makakaghatag ha ira hin proteksyon kontra ha COVID-19 ngan iba pa nga mga sakit.
