Tacloban City – Kamatayon an gindangatan han usa nga 58-anyos nga lalaki mahuman ini pusilon han iya amyaw nga estudyante tungod han gin- aalegar panamay.
Nahitabo an insidente banda alas-7 han aga kanina ha Barangay Cayare, San Miguel, Leyte.
Sumala kan PMSgt Rico Cañeda, imbestigador han San Miguel Municipal Police Station, ginkilala an biktima nga hi Artemio Brazil, municipal electrician ngan residente la ngahaw han mao nga barangay.
Ginkilala naman an suspek nga hi Jorent Greg Labaclado, 20 anyos, senior high school student ha San Miguel National High School
Nagawas ha imbestigasyon nga daw maiha na nga may pagdumot an suspek ha biktima tungod nga makadamo na kabeses hini gintatamay ngan ginminus an estado han ira kinabuhi.
Sanglit kanina han aga han makit- an niya ha gawas han panimalay an biktima in dayon niya ini nga ginpusil makaupat kabeses.
Naigo hin bala ha ulo hi Brazil, hinungdan han dayon hini nga kamatayon.
Samtang, nagpapabilin naman ha hospital iton suspek tungod nga san-o pa man niya mapusil an biktima in aksidente niya nga naigo hin bala an iya teel han huguton niya an iya dara-dara nga calibre 38.
Boluntaryo liwat ini nga sumurender ha mga kapulisan ngan ha pagkayana in gin aandam na an kaso nga murder ngan illegal possesion of firearms nga igpapasaka ha suspek.
