TACLOBAN CITY — Patay an duha nga menor de-edad mahuman nga mabunggo hin usa nga bus an ginsasakyan han mga ini nga motorsiklo ha Brgy. Palarao, Leyte Leyte.
Tulo nga magburugto an sakay han nasabi nga motorsiklo kun diin an 17 anyos nga magurang an driver han mao nga motor samtang sakay hini an duha niya nga mga kabugtuan.
Sumala kan PLt. Jose Bayona, Chief of Police han Leyte Leyte Police Station, an motorsiklo nga ginsasakyan han nasabi nga magburugto in sumaka ha national highway han mao nga baranggay kun diin tiyempo nga naagi an bus ha magkaiba nga deriksyon ngan didto na nahipatik an mao nga insidente.
Basar ha inisyal nga imbestigasyon, nangadto ha ilarom han bus an motorsiklo kun diin matungod ha makusog nga impact in nadanas an motorsiklo ha pira kametro ha nasabi nga kalsada.
Matungod hiton grabe nga naangkon nga mga injuries ha magkalain-lain nga parte hiton lawas han mga biktima in duha han mga ini an naawat an kinabuhi.
Nagpapatambal naman an usa pa nga menor de-edad nga sakay han mao nga motor ha ospital.
Dugang pa han mao nga opisyal, mahuman la nga bumunggo han bus ha mao nga motorsiklo in nahagip pa hini an usa nga truck pero waray naman damage nga naangkon han mao nga truck.
Ha pagkayana in gin-aandam na an kaangayan nga kaso nga igsasalawad kontra ha driver hiton bus.
