TACLOBAN CITY– Gintagan pagklaro han Department of Social Welfare and Development Regional Office Vlll, nga subay ha ira nagin assesment and monitoring, waray stranded nga mga pasaheros, lugod in mga cargo trucks la an ira naabtan ha nasabi nga panginano.
Sumala kan Atty. Jonalyndie Chua, Regional Information Officer, Department of Social Welfare and Development Regional Office Vlll, dayon hira nagdistribwer hiton mga Family Food Packs (FFP) ha mga stranded nga mga drivers han cargo trucks.
Dugang pa hine, ha ira nagin assesment, an mga ine in mayda kalugaringon nga lutuan, utensils, magin tubig ngan iba pa.
Sanglit nga nagdisisyon an ira buhatan nga imbes nga hot meals an igpanhatag in mga Family Food Packs nala agud nga dire an mga ine magpan-os.
Ginmalatumat pa ni Chua, nakaghatag gihapon hira hin FFP ha mga nakahilira ha may Basey areas.
Ha lain nga bahin, yana la hira mahibaro nga mayda gihapon pipira nga mga passengers nga naka-stranded, ngan nagpatapod ine nga dayon hira magdudumara hin pag-asister ha nasabi nga mga stranded passengers.
Ginpatapod gihapon han nasabi nga tagapagyakan, nga naka-standby la an ira buhatan ngan maghahatag hin pag-asister kun anu an ginkikinahanglan han nasabi nga mga stranded cargo truck drivers ngan pahinante.
Mayda gihapon hira gintindog nga mobile command centers ine in nagmomonitor kun anu iton update han natatabo ha San Juanico Bridge, ine an magsisirbi nga mata han iya opisina.
Nanawagan naman ine ha tanan hin kooperasyon, partikular na ha mga namamasaheros nga dire maningabot ha pagsukot hiton pamasahi, lugod bumulig ngan talinguhaon nga maka-intindi ha presente nga sitwasyon.
