NATIONAL – Nag-isyu hin mga aludayday an Department of Labor and Employment para ha sakto nga bayad ha holidays ha Agosto 21 o Ninoy Aquino Day ngan Agosto 25 o National Heroes Day.
Sumala kan Labor Sec. Bienvenido Laguesma, gindeklara ni Pres. Ferdinand Marcos Jr., pinaagi han Proclamation No. 727 an Agosto 21 kumo special non working holiday samtang an Agosto 25 naman kumo regular holiday.
Ha gin-isyu nga guidelines, an mga empleyado ha mga pribado nga sektor nga masulod ha Agosto 21 in kinahanglan makakarawat hin kadugangan nga 30% han ira inadlaw nga sweldo labot la han ira basic wage para ha siyahan nga walo ka-oras.
Kun overtime naman, kinahanglan makakarawat an mga empleyado hin 30% han ira inoras nga sweldo. Kun na-timing nga rest day, in kinahanglan nga makakarawat hin dugang nga 50% han 200% han holiday rate ngan kun overtime pa in mayda dugang nga 30% han inoras nga sweldo.
Samtang, para naman ha regular holiday ha Agosto 25, kinahanglan nga makakarawat hin double pay ha siyahan nga walo ka-oras ngan kun overtime in makakarawat hin dugang nga 30% han ira inoras nga sweldo.
Kun rest day han empleyado naman ngan sumulod ini in kinahanglan bayaran hin dugang nga 30% han basic wage labot pa ha double pay ngan kun overtime, may dugang nga 30% han inoras nga sweldo.
