NATIONAL NEWS– Ginbasura han Department of Justice (DOJ) an mga reklamo nga kriminal nga ginsalawad ni anay Pangulong Rodrigo Duterte kontra ha mga higtaas nga opisyal han pulisya ngan gobyerno kasumpya ha natabo nga raid ha Kingdom of Jesus Christ (KOJC) compound ha Davao City hadton Hunyo 2024.
Ha ginpagawas nga resolusyon, ginpahayag han mga piskal nga waray sadang nga basaran o probable cause para igdayon an kaso nga malicious mischief ngan violation of domicile.
An reklamo ni Duterte, nga ginsalawad kumo KOJC administrator, in nag-ugat hiton operasyon han pulisya hadton Hunyo 10 ha Glory Mountain Compound samtang nagdudumara hin prayer meeting.
Mababaruan nga maabot ha 400 nga mga armado nga kapulisan an sumulod ha lugar agud nga arestuhon hi Pastor Apollo Quiboloy.
Dugang ni Duterte, pagtalapas ha balaod an ginhimo nga pagsulod han mga kapulisan matungod nga arrest warrant la an ira ginpakita nan waray hira search warrant.
Gintagan duon gihapon hine an gin-aaligar pagmaltrato ha mga miyembro han simbahan, ngan panguba hiton mga ari-arian.
